As ouers nie ingryp by vet kind is dit verwaarlosing?

Article Source: Beeld 2010-07-18 22:00

Die ouers van vetsugtige kinders se volgehoue versuim om hul kind te help om sy lewenstyl te verbeter of mediese praktisyns te nader vir hulp, kan neerkom op kinderverwaarlosing.

Dit is veral ter sprake wanneer dié kinders op die punt is om toestande soos obstruktiewe slaapapnee, hoë bloeddruk en tipe 2-diabetes te ontwikkel of onbeweeglik raak.

So het ’n groep Britse kenners in die veld van kindergesondheid besluit nadat hulle die lot van sulke kinders bespreek het met die doel om ’n raamwerk vir mediese en ander maatskaplike praktisyns daar te stel.

Dr. Russell Viner van die University College of London se instituut vir kindergesondheid en sy kollegas het hul voorstelle in die jongste uitgawe van die British Medical Journal gepubliseer.

Die kenners het studies gevind wat toon daar is ’n verband tussen vetsug by kinders en seksuele mishandeling, geweld en verwaarlosing, maar hulle kon geen navorsing opspoor oor kinderbeskerming en vetsug as sulks nie.

Hulle het tot die gevolgtrekking gekom dat dit nie nodig is vir kinderbeskermingseenhede om op te tree teen ouers bloot omdat hul kinders vet is en hulle misluk in hul pogings om die kinders gewig te laat verloor nie.

Hulle was dit eens dat die oorsake van vetsug te kompleks is daarvoor.

Hulle het wel aanbeveel dat gesinne en omgewingsfaktore bestudeer word in gevalle waar kinders erg vetsugtig is en ouers niks doen om in te gryp nie.