Where your health is a way of life.

Vetsug in SA

Kaapstad - Ofskoon 61% van Suid-Afrikaners oorgewig is of aan vetsug ly, ontken die meeste dié probleem en wys hulle gou vinger na ánder mense.

Resultate in ’n landwye studie het getoon net 34% van mense dink die skaal kreun te swaar onder hul eie gewig, terwyl 74% gedink het ánder mense is te vet.

Die waarheid, volgens Added Value, wat die studie namens GlaxoSmithKline gedoen het, wys Suid-Afrikaners is oor die algemeen in groot ontkenning oor hulle gewigsprobleme en volg ook nie behoorlike eetplanne nie.

Die resultate is Woensdag hier in ’n voorlegging aan die media bekend gemaak.

Byna die helfte van mense wat aan erge (morbiede) vetsug ly, glo hulle is redelik gesond, of baie gesond.

Volgens dr. Wayne May, ’n endokrinoloog, verhoog ’n mens se risiko om tipe-2-diabetes te kry aansienlik met elke punt wat jou liggaamsmassa-indeks bo die normale styg.

Teen die tyd wat ’n mens aan vetsug ly (met ’n liggaams-massa-indeks van 30 punte of hoër), is jou risiko vir dié siekte 40 maal meer vir vroue en 11 maal meer vir mans.

Die kanse om dood te gaan weens hartsiektes styg ook 1,5 maal vir albei geslagte wanneer dié punt bereik word, en daarna skiet die kanse die hoogte in.

Tog het 42% van al die respondente in die studie geen kommer oor hul gesondheid gehad nie.

Net minder as die helfte van mense wat aan die studie deelgeneem het, glo oefening is van kardinale belang om gesond te bly, maar net sowat ’n vyfde oefen wel na behore.

Soveel as een uit elke drie mense het nog nooit hul teikengewig bereik nie.

Suid-Afrikaners peusel tussen 13:00 en 19:00 aan happies veral omdat hulle “verveeld, alleen, gefrustreerd en ongelukkig is”, het dr. Zubeida Mahomedy, ’n psigiater, gesê.

Dit blyk uit die studie die meerderheid mense verstaan die inligtingsetikette op kos- verpakkings, maar hulle bestudeer dit nie wanneer daar oorweeg word wat om eet nie.

Mense pak die skuld op die regering en glo daar word nie genoeg gedoen om hulle in te lig oor gesonde eetgewoontes nie.

Hulle glo ook hulle word nie beskerm teen ongetoetste gewigsverliesprodukte nie.

Die helfte was van mening gesonde kos moet goedkoper wees.

Source: Die Burger

View All Articles